مومياء الملك توت عنخ آمون الغير محظوظ !
أكيد أي طفل في مصر القديمة كان بيحلم ويتخيل ياسلام لو بقيت أنا ملك مصر..اشمعنا توت عنخ آتون (اسمه وقت توليه الحكم) عمره 9 سنين وبقا الملك أكيد هو أسعد طفل في الدنيا
بس في الواقع من وجهة نظري هو كان طفل غير محظوظ بل قصته بائسة من بدايته لقى والده اخناتون مغير ديانة الدولة وفي صدام مع كهنة آمون وربما الشعب..وكمان نقل العاصمة لمكان جديد وفجأة ولسبب غير معلوم توفى اخناتون وساب الطفل توت يواجه مصيره كوريث لحكم مصر!
ممكن نتخيل ايه اللي ممكن يكون حصل لتوت اللي عمره 9 سنين من الكهنة وأطراف أخرى ودا واضع ان اسمه اتغير من توت عنخ آتون إلى توت عنخ آمون وتغيير العاصمة مرة تانية..في صورة واضحة للتأثير اللي حصل من المحيطين به وان المسار اللي خده والده دا لازم يتم تصحيحه وفي خلال حكم توت نفسه..يبدو ان توت اتجوز عنخ إسن آمون وحاول الإنجاب لكن الطفلتين توفوا ومكنش عنده طبعاً وريث لحكم مصر..كمان من شبه المؤكد ان توت كان بيواجه صعوبة في المشي وبيستخدم العصي أو العكاز يسند عليه!
وحتى لما مات وهو أقل من 20 سنة لسبب غير مؤكد 100% لحد دلوقتي سوء الحظ لم ينتهي وفيه بعض وجهات النظر ان وزيره آي دفنه في المقبره بتاعه الصغيرة التي لا تليق بملك وخد المقبره بتاعه لنفسه وكمان اتجوز زوجته وسيطر على الحكم..ومش بس كدا فيه دراسات اتعملت على المومياء واتضح انها تفحمت بسبب ان تم دفنه بسرعة قبل وقت كافي وتفاعلت مواد التحنيط وتفحم ببطء..
حتى لما تم إكتشاف مقبرته كاملة وبقا أكتر ملك محظوظ في تاريخ مصر بما ان اللصوص ماوصلوش لمقبرته..هوارد كارتر كسر المومياء بتاعه لأكتر من 10 أجزاء وهو بيفك القناع والأساور الذهبية من على المومياء وللأسف بقت حالتها أسوأ مما كانت.
لكن تظل الفكرة عن توت عنخ آمون هي الكنوز الرائعة اللي في مقبرته ومش كتير بيركز على قصة الملك الحزينة..واللي أكيد محدش هيتمنى يكون في مكان الملك
